Сар аз 1-уми январ нархи ҳаққи моҳонаи нигоҳубини кӯдакон дар боғчаҳои давлатӣ боло рафтааст ва масъулони ин боғчаҳо ба ҷойи 120 сомонии пешин, ҳоло 130 ва ҳатто 140-150 талаб мекунанд.
Азиза Собирова, сокини пойтахт ба “Азия-Плюс” гуфтааст, ки аз кӯдакистон ба онҳо иттилоъ додаанд, ки бо қарори ҳукумат маблағи пардохти кӯдакистон аз 120 ба 128 сомонӣ афзоиш ёфтааст. Ӯ ҳамчунин гуфт, ба ҷуз аз 128 сомонии маблағи тасдиқшуда, боз 20-30 сомонии дигар ба омӯзгорон медиҳанд.
Дар сарраёсати маорифи шаҳри Душанбе боло рафтани ҳаққи моҳонаи кӯдакистонҳоро ба афзоиши ҳаҷми нишондиҳанда барои ҳисобҳо дар кишвар марбут медонанд.
“Аз якуми январи соли 2020 ҳаҷми нишондиҳанда барои ҳисобҳо 64 сомонӣ шуд, ки пештар 60 сомонӣ буд. Ҳаққи моҳонаи кӯдакистонҳо, ки ду нишондиҳанда буд, акнун 128 сомонӣ шуд”,-мегӯянд дар ин ниҳод..
Аммо ин ниҳод мегӯяд, ки дар сурати исбот гардидани зиёд талаб намудани хаққи моҳона, масъулони кӯдакистонҳоро муштаракан бо мақомоти ҳифзи ҳуқуқ ҷазо медиҳанд.
Ҳамчунин Сарраёсати маорифи Душанбе бо ин мазмун дар шабакаҳои иҷтимоӣ эълонеро низ паҳн намудааст.
Аммо дар шабакаҳои иҷтимоӣ волидон аз боло рафтани ҳаққи нигоҳубини кӯдакон дар боғчаҳо нигаронӣ мекунанд. Бархеи онҳо мегӯянд, ки яз январи соли 2022 ба онҳо гутфа шудааст, ки на 120, балки 140 сомонӣ пардохт намоянд.
Як сокини пойтахт Зулайхо, ки фарзандаш дар яке аз кӯдакистонҳои пойтахт тарбият мегирад гуфт, ки аз онҳо на 128, балки 150 сомонӣ талаб кардаанд. Ӯ гуфт, ҳарчанд 20 сомонӣ зиёд додан маблағи ночизе барои фаъолияти муррабиён дар як моҳ аст, аммо барои бархе хонаводаҳо ки 2-3 фарзандашон дар кӯдакистонанд, «пули калон» аст.
Ин бону мегӯяд, онҳо дар ҳақиқат онҳо огаҳ нестанд, ки тибқи талабот бояд чанд сомонӣ бипардозанд.
Сарраёсати маориф мегӯяд онҳое, ки дар боғчаҳо ба ин мушкил рӯ ба рӯ мешаванд, метавонанд ба рақами телефони боварии ин ниҳод – 2213092 тамос бигиранд.
Дар ҳоли ҳозир дар Душанбе 150 муассисаи таҳсилоти томактабӣ мавҷуд аст, ки 30 739 нафар тарбиятгирандагонро фаро гирифтаанд. Аз ин теъдод, 92 муассиса буҷавӣ, 46 муассиса хусусӣ ва 12 муассисаи дигар вобастаи корхонаву ташкилотҳо мебошанд.
