Дар Русия, тибқи фармони Владимир Путин, Хадамот оид ба масъалаҳои шаҳрвандӣ ва бақайдгирии шаҳрвандони хориҷӣ дар сохтори Вазорати корҳои дохилӣ таъсис дода мешавад. Роҳбарии онро собиқ прокурор Андрей Кикот ба уҳда мегирад.
Оё ин ваколатҳои полисро бештар мекунад? Чӣ гуна ин тадбир ба тамоюли фишор ба муҳоҷирон мусоидати бештар мекунад ва чаро мақомоти рус ба як ниҳоди нав эҳтиёҷ пайдо карданд?
Мухтасар дар гузориши “Новая-Европа”.
Чӣ шуд?
Владимир Путин фармон дод, ки дар сохтори Сарраёсати муҳоҷирати ВКД Русия Хадамот оид ба масъалаҳои шаҳрвандӣ ва бақайдгирии шаҳрвандони хориҷӣ таъсис дода шавад. Ин санад 2 апрел дар сомонаи Кремл нашр шудааст.
Ҳукумати Русия бояд дар муддати се моҳ пешниҳодҳо оид ба танзими шумораи кормандони ВКД-ро таҳия намояд.
Роҳбари ниҳоди нав Андрей Кикот таъйин шуд. Ӯ муовини додситони генералӣ дар Округи федералии Ҷанубӣ буд ва акнун дар вазифаи муовини аввали вазири корҳои дохилӣ кор мекунад.
Полис ба ин чӣ рабт дорад?
То соли 2016 масъалаҳои муҳоҷират дар Русияро Хадамоти федералии муҳоҷират (ФМС), ки моҳи июни соли 1992 таъсис ёфта буд, баррасӣ мекард. Аммо моҳи апрели соли 2016 ин хадамот барҳам дода шуд ва ваколатҳои он ба Сарраёсати муҳоҷират гузашт, ки ба як қисми ВКД табдил ёфт.
Додситони генералӣ Игор Краснов зимни суханронӣ дар Шӯрои Федератсия изҳор дошт, ки Прокуратураи генералӣ фаъолияти ВКД-ро дар самти назорати муҳоҷират таҳлил намуда, камбудиҳои ҷиддиро ошкор кардааст.
Ба гуфтаи ӯ, Прокуратураи генералӣ 1,5 ҳазор парвандаи сохтаеро, ки барои қонунигардонии муҳоҷирон истифода мешуданд, бекор кардааст.
Хадамоти нав чӣ гуна фаъолият хоҳад кард ва ба кӣ тобеъ мешавад?
Роҳбари хадамот, Андрей Кикот, муовини вазир таъйин мешавад. Аз ин рӯ, эҳтимол дорад, ки мақоми хадамоти нав болотар аз Сарраёсати муҳоҷират бошад, изҳор дошт як демограф, ки бо масъалаҳои муҳоҷират машғул аст (ва нахост номаш зикр шавад) дар суҳбат бо “Новая-Европа”.
Ба гуфтаи ин коршинос, дар Сарраёсати муҳоҷират бисёр вазифаҳо муттаҳид карда шудаанд, ки на ҳама ба сиёсати муҳоҷират марбутанд, масалан, сабти ном ва кор бо шиносномаҳои шаҳрвандони Русия. Аз ин рӯ, таъсиси як хадамоти ҷудогона, ки танҳо бо шаҳрвандони хориҷӣ сарукор дорад, иқдоми мантиқӣ ба назар мерасад.
“Азбаски ин ниҳод дар сохтори ВКД таъсис меёбад ва роҳбари он собиқ прокурор аст, дар ибтидо мумкин аст, ки ин ҳамчун чораи сахтгирона ва тарснок қабул шавад. Дар бисёре аз кишварҳо ВКД сиёсати муҳоҷиратро назорат мекунад, аммо дар Русия вазифаи асосии он мубориза бо ҷинояткорӣ мебошад.
Ҷанбаи гуманитарӣ гоҳе тамоман аз мадди назар дур мемонад.
Баъдан маълум мешавад, ҳайати нави хадамот чӣ гуна ташкил хоҳад шуд. Ҳанӯз нафароне ҳастанд, мефаҳманд муҳоҷират чист ва медонанд, ки муҳоҷирон ҷинояткор нестанд ва на бо нияти вайрон кардани қонун ба Русия меоянд”,- хулоса кард ин демограф.
Муҳоҷирон бояд чиро интизор бошанд?
Ба гуфтаи директори маркази таҳлилии Central Asia Due Diligence, Алишер Илҳомов, хадамоти нав дар сохтори ВКД барои афзоиши эътимод дар назди ҷомеа таъсис дода мешавад. Давлат мехоҳад нишон диҳад, ки гӯё амнияти шаҳрвандонро таъмин мекунад.
“Мақомот муҳоҷиратро на ҳамчун як ҷузъи сиёсати иқтисодӣ, балки бештар ҳамчун масъалаи амниятӣ мебинанд”,- таъкид кард ӯ.
Ба гуфтаи Илҳомов, таъсиси хадамоти нав маънои онро дорад, ки фишор ба муҳоҷирон боз ҳам бештар хоҳад шуд.
