Дар назар аст, ки дар Тоҷикистон ҳудуди боз 5 ҳазор (!) минтақаи аҳолинишин ва ҷуғрофии дигар аз нав номгузорӣ шаванд. Ин нуқтаро Шарифҷон Ҷумъазода, раиси Кумитаи рушди маҳаллӣ зимни нишасти хабарӣ қайд намуд.
Ба гуфтаи Ҷумъазода, гурӯҳи кории вижа аз моҳи ноябри соли 2021 беш аз 12,5 ҳазор номгӯи мавзеъро мавриди омӯзиш қарор дода, ба хулосае омадааст, ки номи 4 ҳазору 31 объекти ҷуғрофӣ ва 802 минтақаи аҳолинишин ба воқеияти имрӯза мувофиқат намекунад.
Дар ояндаи наздик дар вилояти Суғд номи 170 минтақаи аҳолинишин, дар вилояти Хатлон 342, дар шаҳру ноҳияҳои тобеи ҷумҳурӣ 238 ва дар ВМКБ 52 маҳал номи худро иваз мекунанд, қайд намуд Ҷумъазода.
Ӯ қайд кард, ки иваз кардани номи минтақаҳои аҳолинишин як раванди доимӣ аст ва идома хоҳад ёфт.
