Дар Хадамоти алоқа аз беҳшавии суръат ва арзон шудани интернет гуфтанд

Нархи интернет дар кишвар нисбатан коҳиш ёфта, суръати он низ тадриҷан беҳтар шуда истодааст, иддао кард раиси Хадамоти алоқаи Тоҷикистон Исфандиёри Саъдулло имрӯз, 23 июл зимни нишасти матбуотӣ.

Ба гуфтаи ӯ, дар ҳоли ҳозир арзиши миёнаи 1 Мбит/с интернет ба 17,63 сомонӣ поин омадааст. Ҳамзамон, 1 гигабайт интернети мобилӣ дар бастаҳои пешниҳодкардаи операторҳо ба таври миёна 2,5 сомонӣ арзиш дорад.

“Раванди мазкур идома ёфта, аз 15 июли соли ҷорӣ суръати ҳадди ақали интернет ба 15 Мбит/с баробар гардида, то охири соли ҷорӣ суръати интернет ба 30 Мбит/с ва дар се соли оянда ин нишондод ба 100 Мбит/с расонида хоҳад шуд”, - афзуд Исфандиёри Саъдулло.

Ба таъкиди раиси Хадамоти алоқа, дар кишвар дигар тарофаҳо бо суръати камтар аз 5 Мбит/с вуҷуд надоранд ва дар сурати мушкилӣ, истифодабарандагон метавонанд ба ширкатҳои мобилӣ муроҷиат намоянд.

Бо вуҷуди ин, бархе муштариён мегӯянд, тағйироти ҷиддие дар тарофаҳои қаблан фаъолшуда мушоҳида намекунанд ва навгониҳо асосан ба муштариёни нав дахл доранд.