Ҳафтаномаи “Фараж” пас аз 20 соли нашр аз чоп монд

Ҳафтаномаи “Фараж” пас аз 20 сол дигар ба шакли чопӣ нашр намешавад. Акнун гурӯҳи эҷодии он кори худро дар шабакаҳои иҷтимоӣ, аз ҷумла Фейсбук дар саҳифаи наве бо номи “Фараҳ” идома медиҳад.

“Мо мехоҳем, шакли корро дигар кунем, шакли тарғибро дигар кунем, фоида нест аз газета, аз баҳри нашри чопӣ алъон гузаштем. Номашро аз “Фараж” ба “Фараҳ” баргардон кардем”, гуфтааст Хуршед Атовуллоев, муассиси «Фараж» ба Радиои Озодӣ.

Ҳарчанд ҳафтаи дар шабакаҳои иҷтимоӣ овозаҳо дар бораи бастани “Фараж” ва “Самак” паҳн шуданд, вале Атовуллоев ин иддаоҳоро рад карда гуфта буд, ки ҳеҷ қароре дар мавриди бастани ин нашрияҳо содир нашудааст.

Ба гуфтаи ӯ, солҳои тилоии “Фараж” ба давраи 2007–2012 рост меояд, вақте шумораи нашр ба 15 ҳазор нусха мерасид. Аммо солҳои охир нашр коҳиш ёфта, “Фараж” бо 2500 ва “Самак” бо ҳамагӣ 226 нусха ба нашр мерасиданд.

Нахустин шумораи “Фараж” 22 декабри соли 2005 ба табъ расида буд.