Гурез Саидов, сокини ноҳияи Шоҳмансур бо қарори Суди шаҳри Душанбе ба муҳлати 25 сол аз озодӣ маҳрум шуд. Ӯ дар куштори духтари хурдсолаш айбдор дониста мешавад.
Сомонаи Прокуратураи генералии Тоҷикистон дар ин бора хабар дод.
Гурез Саидов бо моддаи 104 қисми 2 бандҳои “в,е” Кодекси ҷиноии кишвар гунаҳгор дониста мешавад. Ба ӯ ҷазо дар намуди маҳрум сохтан аз озодӣ ба муҳлати 25 сол бо адо намудани ҷазо дар колонияи ислоҳии дорои низомаш пурзӯр таъин шудааст.
Гурез Саидови 67 – сола (соли таваллудаш 1956) соҳиби 7 фарзанд аст. Ӯ 28 уми октябри соли 2022 бо мақсади харидорӣ намудани доруворӣ хостааст аз ҷайби костюмаш маблағи пулӣ гирад. Вале 1000 сомониро пайдо намекунад.
Ӯ духтари 12 – солаи худро ба дуздии пул гунаҳкор мекунад. Аз шиддати қаҳру ғазаб ӯро шадидан латукӯб мекунад. Кӯшишҳои ҳамсар ва фарзандони дигараш барои қатъи латукӯб натиҷа намедиҳад. Мард онҳоро низ зада, аз хона меронад.
Дар натиҷа Мадинаи хурдсол ҷароҳатҳои гуногуни ҷисмонӣ бардошта, дар ҷойи ҳодиса ба ҳалокат мерасад.
