Садамаи сечарха дар Вахш: 3 хоҳар ба ҳалокат расиданд

12 июл Раҷабалӣ Саидалиев, сокини 49-солаи ноҳияи Вахш, ронандаи мотороллер ҳангоми ҳаракат "бинобар риоя накардани қоидаҳои ҳаракат дар роҳ" дар ҳудуди деҳаи Шаршари ин ноҳия ба канори роҳ баромада, ба чуқурӣ сарозер шудааст.

Дар ин бора Раёсати ВКД дар вилояти Хатлон дар як гузориши видеоӣ хабар дод.

Дар ин сечарха 8 нафар мусофир савор будаанд, ки бар асари ин ҳодисаи марговар се хоҳари ронанда, Гулрухсор Қурбонова, Зебунисо Саидалиева ва Малика Саидалиева ба ҳалокат расидаанд.

Инчунин, дигар пайвандону аъзоёни оилаи ронанда, Зулайхо Саидалиева, Мушкинисо Шоева, Абдулло Қурбонов ва Ҷалолиддин Сафарзода ҷароҳатҳои гуногуни ҷисмонӣ бардошта, дар беморхонаи марказии ноҳияи Вахш бистарӣ шудаанд.

"Ман моторолерро тақрибан ду ҳафта пеш (аз ҳодиса) харида будам. Ҳанӯз онро наронда будам ва таҷрибаи рондан надоштам. Дар хонаи ҳамсоя кор мекардам, ки маро гуфтанд ба хонаи тағоям якҷо меҳмонӣ равем. Гуфтам, ки ҳоло ҳуҷҷат надорам.

Гуфтанд, ҳеҷ гап надорад, "худамон ҷавобашро медиҳем". ба дохили мотороллер кӯрпача партофта ҳама савор шуданду хостанд, ки биронам. Дар роҳ як чуқурӣ буд, хостам онро чап диҳам, вале даступо хӯрда ба он сарозер шудем. Се хоҳарамро аз даст додам, ду хоҳари дигарам дар беморхона бистарӣ аст. Бисёр афсӯс мехӯрам",- мегӯяд Раҷабалӣ Саидалиев дар гузориш.

Нисбати Раҷабалӣ Саидалиев бо моддаи 212 Кодекси ҷиноятӣ (вайрон кардани қоидаҳои ҳаракат дар роҳ, ки боиси марги одамон шудааст)  парвандаи ҷиноятӣ оғоз гардида, тафтишот идома дорад.

Ба иттилои Раёсати ВКД дар вилояти Хатлон, бо иштироки мотороллер, мототсикл, скутер ва монанди инҳо давоми 6 моҳи соли равон 42 садама рух дода, дар натиҷа 26 нафар ба ҳалокат расида, 37 нафар бо ҷароҳатҳои гуногуни ҷисмонӣ дар беморхона бистарӣ гардидаанд.