Марги 3 шаҳрванди Тоҷикистон дар як садама дар Русия

Дар як садамаи маргбори нақлиётӣ дар вилояти Уляновски Русия се шаҳрванди Тоҷикистон ба ҳалокат расиданд. Ҳодиса субҳи 23-юми июл дар километри 254-уми шоҳроҳи М-5 “Урал”, дар даромадгоҳи шаҳраки Тереенгул рух додааст.

Дар ин бора Кумитаи ҳолатҳои фавқулоддаи Тоҷикистон бо такя ба иттилои Вазорати ҳолатҳои фавқулоддаи Русия хабар дод.

Ба иттилои манбаъ, микроавтобуси Н-1 бо мошини боркаши КамАЗ, ки дар канори роҳ қарор дошт бархӯрдааст. Дар натиҷа се нафар дар ҷойи ҳодиса ҷон бохта, шаш тани дигар ҷароҳат бардоштанд.

Шаҳрвандони Тоҷикистон, ки дар ҷойи ҳодиса ба ҳалокат расидаанд:

• Мардонов А.С., соли таваллудаш 1993;
• Карамхудоев Н.Қ., соли таваллудаш 1997;
• Саидов А.С., соли таваллудаш 1991;

Гуфта мешавад, Прокуратураи ноҳияи Тереенгулск ба таҳқиқи сабабу омилҳои ин садама оғоз кардааст.