Дар Русия муҳоҷири тоҷик тифли 11-моҳаро наҷот дод

Дар вилояти Москва Бахтиёр Исмоилов, зодаи Тоҷикистон духтараки 11-моҳаро, ки дар роҳ бе либоси зимистона танҳо монда буд, наҷот дод. Тибқи иттилои расонаҳои Русия, Бахтиёр дар як ширкати интиқоли ғизои тайёр кор мекунад ва ҳангоми аз кор баргаштан дар роҳ кӯдакро дидааст.

Ба гуфтаи Исмоилов, ӯ таваққуф кард, духтарро ба мошин даровард, ба матоъ печонид, ба ёрии таъҷилӣ ва полис занг зад. Вай инчунин қайд кард, ки бибии духтарак пас аз тақрибан 10 дақиқа пайдо шуд ва талаб кард, ки кӯдакро ба ӯ диҳад. Аммо ин зан суроғаи истиқомат ва рақами телефони волидони духтаракро гуфта натавонист.

"Ӯ (кӯдак) дар тан танҳо як либоси сабук дошт, бе либоси болоӣ буд. Чӣ хел ба ин ҳол дар сардӣ бибӣ ӯро ба берун мебарорад? Илова бар ин, ман аллакай ба полис занг зада будам",- гуфт мард.

Бахтиёр гуфт, ки духтарак сахт гиря мекард. Мард кӯдакро ба матоъ печонид ва дастонашро молиш дод. Ёрии таъҷилӣ пас аз 15 дақиқа расид.

Ӯ инчунин нақл кард, ки модари кӯдак аллакай ба ӯ занг зада, барои наҷоти духтараш ташаккур гуфтааст.

"Ҳоли духтарак, тавре ман фаҳмидам, ҳоло хуб аст. Ба ӯ каме хунук таъсир кардааст, аммо дар хона табобат мегирад",- илова кард Бахтиёр Исмоилов.