Кормандони милитсияи Душанбе сокини ноҳияи Рӯдакӣ Шарафҷон Насриддинови 36-соларо бо тахаллуси “Қорӣ Раҷаб” боздошт кардаанд. Дар ин бора Вазорати корҳои дохилӣ дар гузориши “Милитсия ҳомии ҷомеа” хабар дод.
“Ӯ бидуни маълумоти зарурии динӣ дар масҷиди “Қазоқон”-и ноҳияи Синои пойтахт фаъолияти динӣ мебурдааст. Ҳамчунин, дар маъракаҳо бо дуохонӣ пул кор мекардааст”,- гуфта мешавад дар гузориш.
Ба иттилои ВКД, “Қорӣ Раҷаб”, инчунин се зан, аз ҷумла як ноболиғро ба никоҳаш дароварда, аз ҳисоби онҳо зиндагӣ мекардааст.
Худи Насриддинов дар навори гузориш мегӯяд, “зани аввалашро, ки аз ӯ ду фарзанд дорад, талоқ дода, чанде пеш бо ҳамсари сеюмаш никоҳ кардааст”. Аммо, ба гуфтаи ӯ, зани сеюмаш “мошини ваъдагиашро нахаридааст ва аз низ ӯ ҷудо шудааст”.
Боздоштшуда мегӯяд, “никоҳи се занро мувофиқи суннатҳои ислом иҷро кардааст”.
Ӯ, инчунин иқрор мешавад, ки барои дуохониҳояш пул мегирифтааст.
Айни замон нисбати Шарафҷон Насриддинов тибқи қисми 2 моддаи 247 Кодекси ҷиноятии Ҷумҳурии Тоҷикистон (“Қаллобӣ”) парвандаи ҷиноятӣ боз шудааст.
Тибқи ин модда боздоштшударо ҷарима ба андозаи аз 250 то 365 нишондиҳанда барои ҳисобҳо, (1 нишондиҳанда баробар ба 72 сомонӣ), маҳдуд кардан аз озодӣ ба мӯҳлати то 3 сол ё маҳрум сохтан аз озодӣ ба муҳлати то 2 сол интизор аст.
