Ҳушдори Вазорати меҳнат ба муҳоҷирон: ашёи бегонагонро дар Русия барои интиқол қабул накунед

Намояндагии Вазорати меҳнат, муҳоҷират ва шуғли аҳолии Тоҷикистон дар Русия ба шаҳрвандон ҳушдор додааст, ки ҳангоми сафар ба ин кишвар ё бозгашт ба Ватан дар фурудгоҳҳо бағоҷ, ҳуҷҷатҳо ва дигар ашёи шахсони ношиносро қабул накунанд.

“Ҳангоми сафар ба Русия ё зимни бозгашт ба Ватан дар фурудгоҳҳо бағоҷҳои шахсони ношинос, ҳуҷҷатҳо ва дигар ашёи номуайянро барои интиқол додан ба кишвари дигар қабул накунед”,- омадааст дар изҳороти намояндагӣ.

Инчунин, гуфта мешавад, муҳоҷироне, ки дар дохили Русия аз як вилоят ба вилояти дигар сафар мекунанд, аз қабули бағоҷи шахсони бегона худдорӣ намоянд.

Ба гуфтаи ин ниҳод, шахсоне, ки ба фаъолияти таксиронӣ ё хизматрасонии интиқоли фармоиш машғуланд, бояд қабл аз қабул, пурсон шаванд, ки онҳо чиро интиқол медиҳанд.

Намояндагӣ аз шаҳрвандони Тоҷикистон даъват кардааст, ки “аз интиқоли ашёи иҷозаташон мамнуъ ва истифодаашон ғайриқонунӣ худдорӣ намоянд”.

Барои маълумоти бештар шаҳрвандон метавонанд бо рақамҳои +7 (495) 967-98-44 ва +7 (999) 912-58-68 (WhatsApp) ба намояндагӣ муроҷиат намоянд.