Ҳушдори Тоҷикстандарт аз истеъмоли консерваҳо

Тоҷикстандарт аз шаҳрвандон даъват кардааст, ки ҳангоми харид ва истифодаи консерваҳо эҳтиёткор бошанд, зеро маҳсулоти вайроншуда метавонад боиси заҳролудшавӣ ва бемории ботулизм гардад.

Ба иттилои ин ниҳод, соле даҳҳо оила дар кишвар пас аз истеъмоли консерваҳои сабзавотӣ, махсусан боимҷон, бодиринг, занбӯруғ, сир ва карам, ба ботулизм гирифтор мешаванд. Гуфта мешавад, сабаби асосӣ риоя нашудани қоидаҳои беҳдоштӣ ва коркарди ҳароратӣ ҳангоми омодасозӣ дар шароити хона аст.

Мутахассисон тавсия медиҳанд, танҳо консерваҳои тамғадор ва бо санаи равшани истеҳсол харида, онҳоро дар ҷои хунук нигоҳ дошта шавад ва аз истеъмоли банкаҳои дамида, зангзада ё бӯйнок худдорӣ карда шавад.

Дар сурати ошкор шудани маҳсулоти шубҳанок шаҳрвандон метавонанд ба Агентии Тоҷикстандарт муроҷиат кунанд.

Ёдовар мешавем, дар ноҳияи Спитамени вилояти Суғд 5 нафар узви як оила пас аз истеъмоли консерваи дар шароити хона омодашуда заҳролуд шуда, дар беморхона бистарӣ гардидаанд. Ҳодиса рӯзи 14 январ дар деҳаи Хавотаги ноҳияи Спитамен рух додааст. Дар соли 2026 ин нахустин ҳолати чунин заҳролудшавӣ дар минтақа ба ҳисоб меравад.