Ҳушдор дар бораи манъи ҷамъоварии пул барои таъмири мактабҳо дар Душанбе

Сарраёсати маорифи шаҳри Душанбе ба таваҷҷуҳи сокинони пойтахт мерасонад, ки ҷамъоварии ғайриқонунии маблағ аз волидайн, аз ҷумла барои таъмири муассисаҳои таҳсилоти томактабӣ ва миёнаи умумӣ қатъиян манъ аст.

Ба иттилои манбаъ, дар ин бора дастури раиси шаҳри Душанбе Рустами Эмомалӣ аз 17 майи соли 2017 ва дигар санадҳои дахлдор мавҷуданд.

Гуфта мешавад, бо мақсади пешгирии ҳолатҳои коррупсионӣ ва таъмини шаффофият дар муассисаҳои таълимӣ, ҳамзамон мутобиқ ба Қонуни “Танзими анъана ва ҷашну маросим” ва қарорҳои дахлдори Вазорати маориф ҷиҳати пешгирии ҳодисаҳои нохуш ва риояи тартиботи ҷамъиятӣ татбиқ мешавад.

Аз ҷумла, дар ҳамаи муассисаҳои таҳсилоти умумӣ новобаста аз шакли ташкилию ҳуқуқӣ, баргузор намудани чорабиниҳои “Занги камолот” ё “Занги охир”, зиёфату сайругашт ва туҳфасупорӣ манъ карда шудааст.

Манбаъ менависад, сокинон дар ҳолати мушоҳидаи талаби зиёди маблағ аз ҷониби масъулони муассисаҳои таълимии шаҳр, метавонанд арзу шикояти худро тавассути рақами боварии Сарраёсати маорифи шаҳри Душанбе: 221 30 92, Вотсап: +992 002 20 40 40 ва ё почтаи электронӣ: [email protected] пешниҳод намоянд.