Тоҷикистон имкони ҷорӣ намудани низоми бидуни раводид барои шаҳрвандони Чинро баррасӣ мекунад. Дар ин бора дар нишасти матбуотӣ раиси Кумитаи рушди сайёҳӣ Ҷамшед Ҷумъахонзода хабар дод.
Ба гуфтаи роҳбари ниҳод, масъала дар марҳилаи баррасӣ қарор дорад ва мақомот умед доранд, ки чунин иқдом ба соҳаи сайёҳии кишвар таъсири мусбати назаррас мерасонад.
«Умедворем, ки ҷорӣ шудани низоми бидуни раводид бо Чин имкон медиҳад миқдори сайёҳон ба таври назаррас афзоиш ёбад ва имкониятҳои нав барои рушди сайёҳӣ, фаъолияти таблиғотию иттилоотӣ ва соҳаҳои вобаста ба он фароҳам орад», – гуфт Ҷумъахонзода.
Вай таъкид кард, ки Чин дар қатори бозорҳои калидии сайёҳии Тоҷикистон дар баробари кишварҳои арабӣ, Британияи Кабир, Олмон, Фаронса, Русия ва Кореяи Ҷанубӣ меистад. Ба гуфтаи раиси кумита, маҳз шаҳрвандони ин давлатҳо ба сафар ба Тоҷикистон таваҷҷуҳи бештар нишон медиҳанд.
Дар солҳои охир ҷумҳурӣ пайваста низоми раводидро барои як қатор кишварҳо содда мекунад. Аз ҷумла, қаблан низоми бидуни раводид барои парвозҳои ҳавоӣ бо Эрон ҷорӣ шуд. Дорандагони шиносномаҳои одии ду кишвар метавонанд дар ҳудуди ҳамдигар то 30 рӯз дар ҳар давраи 90-рӯза бидуни гирифтани раводид иқомат кунанд.
Мақомот бар ин назаранд, ки тадбирҳои монанд нисбат ба Чин низ ба ҷалби ҷараёни иловагии сайёҳон, афзоиши даромадҳои соҳа ва рушди инфрасохтор мусоидат хоҳанд кард.
Тибқи маълумоти Кумитаи рушди сайёҳӣ, соли 2025 Тоҷикистонро 1 миллиону 784 ҳазор сайёҳи хориҷӣ боздид карданд, ки 530 ҳазор нафар зиёдтар нисбат ба соли 2024 аст. Ҳамзамон, аз 191 ширкати сайёҳии дар кишвар ба қайд гирифташуда, дар амал танҳо 82 ширкат фаъолият доранд.
Дар кумита ҳамчунин зикр карданд, ба операторони сайёҳӣ аллакай тавсия дода шудааст, ки ба мавсими нави сайёҳӣ фаъолтар омодагӣ бинанд, хизматрасониҳоро васеъ намоянд ва шумораи бештари меҳмононро ба кишвар ҷалб кунанд.
