Тоҷикистон ихроҷи паноҳҷӯёни афғонистониро шарҳ дод

Мақомоти Тоҷикистон тасдиқ карданд, ки як гурӯҳ шаҳрвандони Афғонистон аз кишвар ихроҷ шудаанд. Тавре АМИТ “Ховар” бо такя ба иттилои Қӯшунҳои сарҳадии Кумитаи давлатии амнияти миллии Тоҷикистон рӯзи 19 июл хабар дод, сабаби асосӣ - вайрон кардани қонунгузории ҷумҳурӣ дар бахши будубоши шаҳрвандони хориҷӣ будааст.

“Зимни санҷиш далелҳои зерини халалдор кардани талаботи қонунгузории Ҷумҳурии Тоҷикистон аз тарафи шаҳрвандони хориҷӣ ошкор гардиданд: муомилоти ғайриқонунии маводи мухаддир, ташвиқу тарғиби ақидаҳои ҳаракатҳои экстремистӣ, пешниҳоди маълумот ва ҳуҷҷатҳои қалбакӣ барои соҳиб шудан ба мақоми гурезагӣ, вайрон кардани талаботи низоми муҳоҷират, доштани шаҳрвандии кишвари сеюм, истифода кардани қаламрави Тоҷикистон ҳамчун кишвари транзитӣ ва монанди инҳо”, - менависад Қӯшунҳои сарҳадии КДАМ-и Тоҷикистон.

Манбаъ таъкид кардааст, ки ҳоло чораҳои ҳуқуқӣ барои ихроҷи ин афрод аз кишвар татбиқ шуда истодааст.

Гарчанде дар хабари расмӣ дар аввал сухан дар бораи “шаҳрвандони хориҷӣ” меравад, дар поёни он возеҳ таъкид мешавад, ки “ихроҷи теъдоди муайяни шаҳрвандони Афғонистон низ ба ҳамин сабаб аст”.

Сафорати Афғонистон дар Тоҷикистон ва Кумитаи паноҳҷӯёни афғон дар Душанбе то ҳол нисбати ин қазия ба расонаҳо шарҳи расмӣ надодаанд.