Тоҷикистон ҳамлаҳои ИМА ва Исроил ба Эронро қатъиян маҳкум кард 

Вазорати корҳои хориҷии Тоҷикистон бо нашри як изҳорот зарбаҳои нерӯҳои ҳавоии Иёлоти Муттаҳидаи Амрико ва Исроилро ба се таъсисоти муҳими ҳастаии Эрон, ки рӯзи 22 июн сурат гирифт, шадидан маҳкум намуд.

"Тоҷикистон зарбаҳои низомии ИМА ва Исроил ба иншооти ҳастаии Ҷумҳурии Исломии Эронро қатъиян маҳкум намуда, аз шиддат гирифтани муноқиша, ки метавонад ба як ҷанги фарогир бо пайомадҳои хатарнок барои минтақа ва ҷаҳон табдил ёбад, изҳори нигаронии ҷиддӣ мекунад",- омадааст дар изҳорот.

Тоҷикистон бо такя ба меъёрҳои ҳуқуқи байналмилалӣ аз Созмони Милали Муттаҳид, Агентии байналмилалӣ оид ба энержии ҳастаӣ (МАГАТЭ) ва дигар созмонҳои байналмилалӣ даъват кардааст, ки барои пешгирӣ аз чунин низоъҳо, роҳ надодан ба фоҷеаҳои экологӣ ва таъмини суботу амният дар минтақа иқдомҳои қатъӣ андешанд.

"Тоҷикистон бори дигар таъкид мекунад, ки роҳи ягонаи ҳаллу фасли муноқишаҳо муколамаи сиёсию дипломатӣ мебошад ва аз ҳама талошҳое, ки ба коҳиши ташаннуҷ ва барқарории сулҳи пойдор дар Ховари Миёна равона шудаанд, пуштибонӣ мекунад", – таъкид кардааст ВКХ.

Субҳи 22 июн ИМА ба се таъсисоти ҳастаии Эрон — Форду, Натанз ва Исфаҳон ҳамлаи ҳавоӣ анҷом дод.

Ба гузориши The New York Times ва Reuters, ин ҳамлаҳо бо иштироки бомбандозҳои B-2 ва истифодаи мушакҳои вазнини GBU-57 ва Tomahawk сурат гирифтанд.

Президенти ИМА Доналд Трамп изҳор дошт, ки амалиёт комилан муваффақ буд ва “ҳадафи он — маҳдудсозии иқтидори ҳастаии Эрон” мебошад.

Эрон гуфт, ки се иншооти ҳадафшуда қаблан эвакуатсия шуда, зарари ҷиддӣ ба қайд гирифта нашудааст. Бо вуҷуди ин, Теҳрон таъкид кард, ки аз ғанигардонии уран даст намекашад ва ин амалкарди ИМА-ро нақзи ҳуқуқи байналмилалӣ донист.

Дар посух ба ҳамла, Эрон беш аз 30 мушаки баллистикӣ ба самти Исроил партоб намуд.