“Тоҷик Эйр” хатсайри нави Душанбе-Ванҷро ба роҳ монд

Ширкати ҳавопаймоии “Тоҷик Эйр” аз 23 июн парвозҳо дар масири нави Душанбе-Ванҷ-Душанберо оғоз кард. Ба иттилои ширкат, парвозҳо ҳафтае як маротиба, рӯзҳои ҷумъа анҷом дода мешаванд.

Парвоз аз фурудгоҳи Душанбе соати 08:00 субҳ ва аз Ванҷ соати 09:30 сурат мегирад. Вақти парвоз 50 дақиқа аст. Нархи чипта барои як самт 750 сомонӣ муқаррар гардидааст.

Парвозҳо тавассути ҳавопаймои АН-28 анҷом меёбанд.

Харидории чиптаҳо дар бинои марказии “Тоҷик Эйр”, воқеъ дар кӯчаи Мирзо Мастонгулови шаҳри Душанбе ё тавассути телефонҳои +992 900130443 ва +992 110000012 имконпазир аст.

Ин панҷумин хатсайри дохилии ширкати “Тоҷик Эйр” мебошад. Аз аввали соли равон, ширкат парвозҳоро дар масирҳои Душанбе-Хоруғ, Душанбе-Кӯлоб, Душанбе-Панҷакент ва Душанбе-Рашт роҳандозӣ кардааст.

Роҳбарияти ширкат мегӯянд, рушди шабакаи парвозҳои дохилӣ ба беҳтар шудани дастрасӣ ба минтақаҳои дурдаст ва таҳкими алоқаи дохили кишвар мусоидат мекунад.