Теъдоди қурбониёни тармаи рӯзи 15 феврал дар маҳаллаи ба номи Носири Хисрави шаҳри Хоруғ ба 13 нафар расид.
«12 нафари дигар ҷароҳатҳои гуногун бардоштанд», – гуфтааст Умеда Юсуфӣ, сардори маркази матбуоти Кумитаи ҳолатҳои фавқулодаи Тоҷикистон.
Ба гуфтаи ӯ, тибқи маълумоти навшуда, 4 хона пурра, 35 хона ва 5 иншооти маишӣ қисман осеб дидаанд.
Комиссияи вилоятӣ оид ба вазъияти фавкулодда ҳаҷми зарарро муайян мекунад. Айни замон корҳои тоза кардани хонаҳо аз тӯдаи барф дар ҷойи ҳодиса идома доранд.
“Бегоҳии ҳамон рӯз ду сокини деҳаи Хаспои ноҳияи Ванҷ, ки ба маросими дафни сокини 30 – солаи деҳаи Садвади ҷамоати Техарв, ки зери тарма ҷон бохта буд, мерафтанд. Худи онҳо низ зери тарма мондаанд. Ба мо муяссар шуд, ки якеро берун кунем, ҷустуҷӯи дуюмӣ идома дорад», – гуфт Юсуфӣ.
Ӯ гуфт, Кумитаи ҳолатҳои фавқулода ба наздикони ҳалокшудагон изҳори ҳамдардии самимӣ намуда, бори дигар аз мардум даъват мекунад, ки аз сафарҳои дуру дароз, аз сафар ба маҳалҳои тармафароӣ худдорӣ намуда, ҳушёру эҳтиёткор бошанд.
Қаблан Кумита хабар дода буд, ки бинобар гармии рӯзҳои ахир ва боришот хатари фаромадани тарма дар манотиқи ғарбии ВМКБ, дар қаторкӯҳҳои Ҳисор ва ҳамчунин дар роҳҳои Душанбе – Хоруғ, Душанбе – Хуҷанд, Душанбе – Лахш, Хоруғ – Мурғоб, Хоруғ – Ишкошим боқӣ мемонад.
Ба гуфтаи ҳавошиносон, хатари фаромадани тарма то 19 феврали соли 2023 боқӣ мемонад.
Тибқи иттилои КҲФ, аз 13 то 15 феврал дар ҳудуди ВМКБ 27 ҳолати фаромадани тарма ба қайд гирифта шудааст. Дар ноҳияи Ванҷ 11 хоҷагӣ, дар ноҳияи Рӯшон 335 хоҷагӣ, 10 хоҷагии ноҳияи Шуғнон, 39 хоҷагии ноҳияи Роштқалъа ва 17 хоҷагии шаҳри Хоруғ аз минтақаҳои хатарнок ба ҷойҳои амн кӯчонида шудаанд. .
Дар ҳоли ҳозир ғафсии барф дар манотиқи гуногуни ВМКБ аз 20 то 120 сантиметрро ташкил медиҳад.
