Дар натиҷаи боришоти шадид тахминан соатҳои 1:30 дақиқаи рӯзи 4 – уми апрел дар чанд деҳаи ноҳияи Панҷи вилояти Хатлон сел омад. Дар натиҷа чанд таҳхона, заминҳои наздиҳавлигии сокинон ва заминҳои корам зери об монд.
Рӯзи 4-уми апрел, тахминан соатҳои 1:30 дақиқа дар деҳаҳои Селга ва Пахтакори ҷамоати деҳоти Сайфиддини Кабуди ноҳияи Панҷ бар асари боришоти шадид сел омад. Дар натиҷа таҳхонаҳо, заминҳои наздиҳавлигии сокинони маҳаллӣ ва заминҳои корами ҷамоат зери об монданд, менависад дафтари матбуотии КҲФ.
Умеда Юсуфӣ, котиби матбуотии кумита мегӯяд, бо мақсади таъмини бехатарӣ аз ҷониби Комиссияи ҳолатҳои фавқулоддаи ноҳияи Панҷ 15 хонавода, ки дар наздикии селроҳа қарор доштанд, муваққатан ба ҷойҳои амн кӯчонида шуданд.
Барои ташкили кор оид ба рафъи окибатхои офати табиӣ гурӯҳи корӣ бо сардории ҷонишини раиси кумита С. Исозода ба ноҳияи Панҷ рафт. Ҳамчунин, дар ноҳия комиссияи вилоятии ҳолатҳои фавқулодда таҳти роҳбарии раиси вилояти Хатлон Давлаталӣ Саид фаъолият дорад.
“Барои расонидани кӯмак ба зарардидагон ва рафъи оқибатҳои сел ба минтақа нерӯву воситаҳои зарурӣ сафарбар карда шуданд,- гуфт Умеда Юсуфӣ.
Дар ҳоли ҳозир корҳои барқарорсозӣ оғоз шудаанд. Комиссияи ҳолатҳои фавқулоддаи ноҳияи Панҷ ҳаҷми зарарро ҳисоб мекунад. Қурбониҳо ва вайрониҳо ба қайд гирифта нашудааст”,- афзуд ӯ.
Ёдовар мешавем, ки қаблан КҲФ аз эҳтимоли омадани сел дар манотиқи кишвар бар асари боришоти шадид хабар дода, шаҳрвандонро ба ҳушёрӣ даъват карда буд.
