Санаи оғози таътили тобистона ва имтиҳонҳои хатм барои хонандагони мактабҳои таҳсилоти умумии Тоҷикистон муайян шуд. Дар ин бора Вазорати маориф ва илми кишвар хабар дод.
Тибқи фармони вазорат, таътил барои хонандагони синфи 1 аз 25-уми май ва барои хонандагони синфҳои 2 то 11 бошад, аз 1-уми июн оғоз меёбад.
Хонандагони синфҳои 4 то 8 ва синфи 10 пеш аз таътили тобистона имтиҳонҳои аттестатсионӣ месупоранд, ки аз 2-юм то 10-уми июн баргузор мегарданд.
Барои хонандагони синфи 9 имтиҳонҳои хатм аз 2-юм то 16-уми июн ва барои хатмкунандагони синфи 11 аз 2-юм то 20-уми июн баргузор мешаванд.
Ба иттилои манбаъ, дарси донишҷӯён мувофиқи нақшаи таълимии донишгоҳу донишкада ва коллеҷҳо фарқ мекунад, вале бояд ҳамаи донишҷӯён то 5-уми июл имтиҳоноти худро супорида, пурра ба таътили тобистона бароянд.
