Рӯзи 26-уми май дар натиҷаи як садамаи нақлиётӣ дар километри 66-уми шоҳроҳи Душанбе–Хуҷанд–Чаноқ, дар ҳудуди ноҳияи Варзоб, ду нафар ба ҳалокат расида, се тани дигар ҷароҳат бардоштаанд.
Ба иттилои Кумитаи ҳолатҳои фавқулодда, ронандаи мошини “Mercedes-Benz”, сокини деҳаи Рохути ноҳияи Айнӣ, ҳангоми ҳаракат ба самти Душанбе, бо чор мусофир аз роҳ берун шуда, ба ҷарии 400–500 метр сарозер шудааст.
Дар натиҷа, ду мусофир, яке сокини 61-солаи деҳаи Сангистони ноҳияи Айнӣ ва дигаре сокини 29-солаи ноҳияи Мастчоҳи Кӯҳӣ, дар ҷои ҳодиса ҷон бохтаанд. Ронанда ва ду мусофири дигар ҷароҳат бардоштаанд.
Мақомот сабабҳои садамаро таҳқиқ доранд.
