Дар манзили зисти як сокини ноҳияи Деваштичи вилояти Суғд сӯхтор сар задааст, ки сабаби онро ба маҳдудияти нерӯи барқ рабт додаанд.
Дар ин бора Ёрибеки Ҷонибек, сардори идораи сӯхторнишонии ноҳия, ба “Азия-Плюс” иттилоъ додааст.
Ба гуфтаи ӯ, ҳодиса 26-уми ноябр дар хонаи Фаррух Рустамов, сокини 44-солаи деҳаи Эшонқурғон рух дода, сабаби аслӣ номуайянии реҷаи “лимит” будааст.
“Одатан барқ соати 17:00 дода мешуд, вале рӯзи ҳодиса барқ соати 15:00 пайваст шудааст. Сӯхтор бо сабаби нодуруст пайваст кардани ноқилҳои барқӣ аз дарвозахона сар задааст”,- гуфтааст ӯ.
Оташ 125 метри мураббаъро фаро гирифта, 41 ҳазору 600 сомонӣ зарар расонидааст. Дар ҳодиса касе осеб надидааст.
Номгӯи маҳдудиятҳо дар интиқоли нерӯи барқ дар Тоҷикистонро дар ин ҷо хонед.