Русия имсол 21,5 ҳазор патенти кориро бекор кардааст

Аз аввали моҳи январ то охири моҳи майи соли ҷорӣ Русия 21,5 ҳазор иҷозатномаи корӣ (патент)-ро барои муҳоҷирон бекор кардааст. Ин рақам се маротиба бештар аз ҳамин давраи соли 2024 мебошад.

Дар ин бора намояндагии Вазорати меҳнат ва муҳоҷирати Тоҷикистон дар Русия хабар дод.

Ба иттилои ин ниҳод, сабаби асосии бекоркунии патентҳо «пешниҳод накардани маълумот дар бораи фаъолияти меҳнатӣ»-и шаҳрвандон будааст.

Намояндагии Вазорати меҳнати Тоҷикистон дар Русия дар саҳифаи Facebook-и худ намунаи маълумотнома дар бораи фаъолияти меҳнатиро нашр намуда, роҳҳои ирсоли он ба мақомоти дахлдорро шарҳ додааст.

Тибқи қонунгузории Русия, шаҳрвандони хориҷӣ бе доштани иҷозатнома ҳаққи фаъолият надоранд. Ин иҷозатномаро бояд сари вақт тамдид намуда, барои он ҳар моҳ пардохт анҷом дод. Дар акси ҳол, шаҳрванд ҳуқуқи дарёфти даромади расмиро аз даст медиҳад.

Аксари муҳоҷирони тоҷик дар Русия бо патент фаъолият мекунанд ва пайваста таъкид месозанд, ки гирифтани он хароҷоти зиёдеро талаб мекунад. Кор кардан дар Русия бе патент манъ аст ва садҳо муҳоҷир бинобар надоштани он аз кишвар ихроҷ шудаанд.