Дар давоми чор моҳи охир мақомоти Русия беш аз 19,1 ҳазор муҳоҷири ғайриқонунӣ ва шахсони бешаҳрвандиро аз ҳудуди кишвар ихроҷ намудаанд.
Дар байни онҳо шаҳрвандони Тоҷикистон низ ҳастанд, вале шумораи дақиқи онҳо зикр нашудааст.
Дар ин бора хабаргузории “Интерфакс” иттилоъ додааст.
Ин рақам нисбат ба ҳамин давраи соли гузашта 2 ҳазору 600 нафар камтар будааст. Дар чор моҳи соли 2024 шумораи ихроҷшудагон 21,7 ҳазор нафарро ташкил медод.
Сабаби коҳиши миқдори ихроҷ, ба иттилои дафтари матбуоти идораи додгоҳҳои Русия, тамдиди муҳлати қонунигардонии ҳузуру фаъолияти муҳоҷирон то санаи 10-уми сентябри соли 2025 мебошад.
Ёдовар мешавем, охири моҳи декабри соли гузашта президенти Русия фармонеро имзо кард, ки бар асоси он муҳоҷирони ғайриқонунӣ уҳдадор шуданд то 30-юми апрели соли 2025 будубош ва фаъолияти худро дар Русия расман қонунӣ кунанд. Баъдтар, ин муҳлат то 10-уми сентябр дароз карда шуд.
