Рамазон Раҳимзода: Тахминан 100 нафар шаҳрванди Тоҷикистон ба ҷанги зидди Украина рафтаанд 

Рамазон Раҳимзода вазири корҳои дохилӣ гуфт, то имрӯз тахминан 100 шаҳрванди Тоҷикистон, ки дар зиндонҳои Русия адои ҷазо мекарданд, ба ҷанги Украина фиристода шудаанд.

Ӯ имрӯз зимни нишасти матбуоти зикр намуд, ки мақомоти рус чунин оморро ба онҳо пешниҳод намекунанд ва дар бораи теъдоди тоҷикони аз зиндонҳои Русия ба ҷанги Украина фиристодашуда танҳо гуфт, ки “тақрибан 100 нафар ҳастанд”.

Бори аввал аст, ки як мақомдори тоҷик дар бораи тоҷикони аз зиндонҳои Русия ба ҷанг фиристодашуда рақамҳои тахминӣ пешниҳод мекунад.

То ин дам расонаҳо дар бораи наздики 20 шаҳрванди Тоҷикистон хабар нашр карданд, ки аз зиндонҳои Русия ба ҷанги Украина рафта ва кушта шуда, ҷасади бархе ба ватан баргардонида шудааст.

Мувофиқи тадқиқоти BBC, ки моҳи июн расонаӣ шуда буд, дар ҷанги зидди Украина 40 шаҳрванди Тоҷикистон кушта шудааст. Шумораи дақиқи онҳое, ки аз Тоҷикистон дар ин ҷанг иштирок мекунанд маълум нест.

Тавре расонаҳо хабар медиҳанд, Русия асосан зиндониён, муҳоҷирон ва шахсонеро, ки шаҳрвандии ин кишварро гирифтаанд, ба ҷанг мебарад.