Рӯзноманигорону коршиносон нақши расонаҳоро дар пешгирии омилҳои коррупсионӣ баррасӣ карданд

Дар маҳфили навбатии рӯзноманигории иқтисодии “Тавозун” мавзӯи "Нақши расонаҳо дар пешгирии омилҳои коррупсионӣ" баррасӣ гардид.

Маҳфил бо иштироки намояндагони мақомоти давлатӣ, ҷомеаи шаҳрвандӣ ва коршиносону рӯзноманигорон 28-уми август баргузор гардид.

Дар ин нишаст нақши расонаҳо дар пешгирии омилҳои коррупсионӣ, қонунгузорӣ ва барномаҳои давлатии Тоҷикистон дар самти муқовимат бо коррупсия, аҳамияти пешгирии коррупсия дар рушди иқтисоди кишвар, инчунин, тартиб ва самтҳои фаъолияти мақоми олии аудити мустақили давлатӣ, шаклҳо ва тартиби гузаронидани аудити мустақили давлатӣ ва аҳамияти он дар банақшагирии буҷети давлатӣ, ки ба пешгирии омилҳои коррупсионӣ рабт дошт, мавриди баҳсу баррасӣ қарор гирифт.

Намояндагони Агентии давлатии молиявӣ ва мубориза бо коррупсия ва Палатаи ҳисоб нақши ҷомеаи шаҳрвандӣ, ВАО ва рӯзноманигоронро дар пешгирии омилҳои коррупсионӣ муҳим хонданд.

Дар охир баҳсу баррасиҳо миёни иштирокчиён сурат гирифта, мутахассисон ба суоли хабарнигорон посух доданд.

Маҳфили “Тавозун” аз ҷониби Ташкилоти ҷамъиятии “Хома" дар доираи лоиҳаи "Идоракунии босамар барои рушди иқтисодӣ (EGED)" бо дастгирии ташкилоти "ACTED" амалӣ мешавад.