Масъуд Пизишкиён, президенти Ҷумҳурии Исломии Эрон 15 январ бо сафари давлатӣ ба Тоҷикистон меояд, хабар дод АМИТ “Ховар”.
Ба иттилои манбаъ, дар доираи сафар мулоқоту музокироти сатҳи баланди Тоҷикистон ва Эрон баргузор гардида, «маҷмуи васеи масъалаҳои марбут ба ҳамкории дуҷониба баррасӣ мешаванд».
Гуфта мешавад, пас аз мулоқоту музокироти сатҳи олӣ байни Тоҷикистон ва Эрон чанд санади нави ҳамкорӣ ба имзо мерасад.
Дар доираи сафар баргузории Ҳамоиши тиҷоратӣ, сармоягузорӣ ва гардишгарии Тоҷикистон ва Эрон дар назар аст.
Ин аввалин сафари Масъуд Пизишкиён ба Тоҷикистон хоҳад буд.
