Рӯзҳои фарҳанги Озарбойҷон дар Тоҷикистон

Аз 19 то 22-уми майи соли 2025 дар шаҳри Душанбе ва чанд шаҳру ноҳияҳои дигари Тоҷикистон Рӯзҳои фарҳанги Озарбойҷон баргузор мешаванд. Тавре сафорати Озарбойҷон дар Тоҷикистон ва Вазорати фарҳанг гуфтаанд, ҳадаф аз он таҳкими робитаҳои фарҳангӣ миёни ду миллати дӯст аст.

Ба иттилои “Азия-Плюс”, меҳмонон аз Озарбойҷон имрӯз, 19-уми май ба пойтахти Тоҷикистон омада, тайи чанд рӯз як қатор барномаҳои фарҳангиро пешниҳод хоҳанд кард.

20-уми май, соати 16:00 – дар Осорхонаи миллии Тоҷикистон намоишгоҳ таҳти унвони “Мероси миллӣ, дурдонаҳои имрӯзи санъати Озарбойҷон” ифтитоҳ мешавад. Дар он асарҳои рассомони маъруфи озарӣ, аз ҷумла “Мирзо Қодири Эривонӣ: дар буриши услубҳои шарқӣ ва аврупоии ҳунар”, намунаҳои ҳунарҳои мардумӣ, намоиши аксҳои “Қарабоғ: хотираи мероси миллӣ” ва намоиши мӯд пешкаш мегарданд.

Ҳамон рӯз соати 18:00 дар Театри давлатии академии опера ва балети ба номи Садриддин Айнӣ ифтитоҳи расмии Рӯзҳои фарҳангии Озарбойҷон баргузор мегардад.

21-уми май, соати 14:00 – дар Китобхонаи миллии Тоҷикистон гӯшаи адабиёти Озарбойҷон ифтитоҳ шуда, миёни китобхонаҳои миллии Тоҷикистон ва Озарбойҷон маросими имзои Ёддошти тафоҳум сурат мегирад.

Инчунин, соати 18:00 дар Консерваторияи миллии Тоҷикистон шоми мусиқии этноҷаз баргузор мешавад.

Рӯзи 21 май ҳайати расмии меҳмонон ба шаҳри Норак сафар карда, аз “Боғи анор” ва Нерӯгоҳи барқи обии Норак боздид менамоянд. Соати 18:00 дар ноҳияи Данғара ансамбли давлатии асбобҳои мусиқии қадимаи Озарбойҷон барномаи консертӣ пешниҳод мекунад.

22-юми май Рӯзҳои фарҳанги Озарбойҷон анҷом меёбад.

Моҳи майи соли гузашта дар шаҳрҳои Боку ва Ганҷаи Озарбойҷон Рӯзҳои фарҳанги Тоҷикистон низ баргузор гардида буд.