Прокуратураи генералӣ 4 нафарро бо гумони кушторҳо дар Конибодом дастгир кард

Прокуратураи генералии Тоҷикистон аз дастгир шудани 4 нафар бо гумони даст доштан дар кушторҳои пайдарпай дар Конибодом хабар дод.

Ин ниҳод гуфт, ҷиноят "кушода шуд" ва бар зидди боздоштшудагон парвандаи ҷиноятӣ боз гардид.

Ба иттилои манбаъ, ҳамаи онҳо сокинони деҳаҳои шаҳри Конибодом ҳастанд.

Ҳамин тариқ, ба иттилои прокуратура, Солехҷон Худойбердиеви 26-сола, сокини деҳаи Гулбоғ, Аҳадҷон Тухтаеви 27-сола, сокини деҳаи Гулбоғ, Бахтиёр Равшанови 31-сола сокини деҳаи Санҷидзор ва Манучеҳр Одилови 28-сола, сокини ҷамоати деҳоти Ҳамробоев дастгир карда шудаанд.

Манбаъ менависад, Прокуратураи генералӣ кушторҳо дар шаҳри Конибодомро тафтиш намуда истодааст ва фаъолияти гурӯҳи фаврӣ-тафтишотӣ таҳти назорати бевоситаи роҳбарияти олии кишвар қарор дорад.

Рӯзи 16-уми декабр раиси вилояти Суғд Раҷаббой Аҳмадзода баъд аз як рӯзи куштори аъзоёни ду оила ба Конибодом рафта, бо фаъолони ҷомеа ва масъулон баргузор кард. Ӯ гуфта буд, барои ошкорсозии ин ҷиноятҳо “беҳтарин муфаттишону коршиносон аз тамоми мақомоти ҳифзи ҳуқуқу тартибот” сарҷамъ омаданд.

Кушторҳо дар Конибодом ва маҳаллаҳои атрофи он дар охири моҳи март оғоз ёфт. Дар давоми 8 моҳ, тибқи иттилои расонаҳо, ҳадди аққал аъзоёни ҳафт оила, аз ҷумла кӯдакон кушта шуданд.

Мақомоти ҳифзи ҳуқуқ дар бораи боздошти ду гумонбар гузориш доданд. Яке ба ҳабси абад, дигаре ба 20 соли зиндон маҳкум шуд.

Аммо кушторҳо идома ёфтанд. Дар як ҳафтаи охир дар Конибодом даҳ нафар аз се оила кушта шуданд.