Эмомалӣ Раҳмон президенти Тоҷикистон бахшида ба 32-солагии Истиқлолияти Тоҷикистон ба беш аз 200 нафар кормандони касбу кори гуногун мукофот ва унвону ҷоизаҳои давлатӣ супорид. Дар ин бора АМИТ “Ховар” хабар медиҳад.
Маросими мазкур имрӯз, 30-юми август дар Қасри Миллат баргузор гардид. Дар он олимону омӯзгорон, шоирону нависандагон, аҳли фарҳангу санъат ва хизматчиёни ҳарбӣ мукофотҳои давлатӣ ва унвону ҷоизаҳо қадрдонӣ шуданд.
Аз ҷумла, 1 нафар бо унвони Нависандаи халқии Тоҷикистон, 1 нафар бо унвони Шоири халқии Тоҷикистон, 2 нафар бо унвони Ҳунарпешаи халқии Тоҷикистон, 1 нафар бо унвони Ҳофизи халқии Тоҷикистон, 1 нафар бо унвони Арбоби илм ва техникаи Тоҷикистон, 19 нафар бо унвони Ҳунарпешаи шоистаи Тоҷикистон, 20 нафар бо унвони Корманди шоистаи Тоҷикистон, 2 нафар бо орденҳои Спитамен дараҷаҳои I ва II, 7 нафар бо ордени Шараф дараҷаи II, 25 нафар бо медали Ҷасорат, 105 нафар бо медали Хизмати шоиста, 7 нафар бо медали Шафқат ва 11 нафар бо Ифтихорномаи Ҷумҳурии Тоҷикистон сарфароз гардонида шуданд.
Ҳамчунин, гуфта мешавад, 12 нафар барандагони Ҷоизаи ба номи Исмоили Сомонӣ дар соли 2023 гардиданд.
Президент ба 15 нафар олимону омӯзгорони фанҳои табиатшиносӣ, дақиқ ва риёзӣ низ Ҷоизаи давлатии Ҷумҳурии Тоҷикистон дар соли 2023-ро супоридааст.
