Полиси пойтахт мардеро дастгир кардааст, ки 25 сол пеш "ҳамкурсашро парондааст"

Раёсати ВКД дар шаҳри Душанбе аз боздошти Илёс Толиев, марде, ки соли 2000-ум ба паррондани ҳамкурсаш гумонбар шуда, фирор кардааст, хабар дод.

Ба иттилои пулис, Толиев рӯзи 14 декабри соли 2000 замони таҳсил дар курси сеюми факултети ҳуқуқшиносии Донишгоҳи миллӣ бо таппончаи тамғаи Star “бо эҳсоси худнамоӣ” ба донишгоҳ омада, ба тарафи ҳамдарсаш Ситора Кенҷаева тир холӣ кардааст. Дар натиҷа ҷабрдида ҷароҳатҳои вазнини ҷисмонӣ бардошта, то имрӯз аз он ранҷ мебарад.

Пас аз ҳодиса, ба иттилои манбаъ, Толиев барои гурехтан аз ҷавобгарии ҷиноятӣ ба хориҷи кишвар фирор карда, дар ҷустуҷӯи байналмилалӣ қарор доштааст. Дар хабар гуфта намешавад, ки ӯ дар кадом кишвар пинҳон мешуд.

Баъди боздошт, дар навори полис Толиев иқрор шудааст, ки тирандозӣ нохост сурат гирифтааст. Ӯ мегӯяд, баъди ҳодиса аз тарс синфхонаро тарк карда, таппончаро ба дарёи Душанбе партофтааст.

Бар зидди Илёс Толиеви 45-сола бо моддаҳои сӯиқасди ҷиноят (моддаи 32 қисми 3), одамкушӣ (моддаи 104 қисми 2, банди “З”) ва ғайриқонунӣ гирифта гаштани силоҳ (моддаи195 қисми 1) Кодекси ҷиноятӣ парванда боз шудааст.