Падар барои шиканҷа ва ба марг расонидани писари 15-солааш боздошт шуд

Кормандони милитсия марди 40-солаи сокини шаҳри Турсунзодаро бо гумони қасдан расонидани зарари вазнин ба саломатӣ ва ба марг расондани писари 15-солааш дастгир кардаанд.

Дар ин бора Вазорати корҳои дохилӣ хабар дод. 

Ба иттилои манбаъ, дҳастгиршуда 26-уми июл, тахминан соати 10:00, писарашро барои ду маротиба дуздии маблағ, ба миқдори 800 ва 600 сомонӣ гумонбар донистааст.

“Барои ошкор ва иқрор намудан бо истифодаи зӯроварӣ писари ноболиғашро ба воситаи нақлиёти тамғаи “Тико” савор карда ба ҷойи беодам, ба заминҳои ҳудуди ҷамоати деҳоти Навободи шаҳри Турсунзода бурда, бо ноқили тахминан 2-метрӣ аз пойи писараш баста, самти дигари ноқили мазкурро дар қафои воситаи нақлиёташ баста тахминан 100 метр кашола кардааст”,- менависад ВКД.

Дар натиҷа ҷабрдида ҷароҳати вазнин ҷисмонӣ бардошта дар манзили истиқоматиаш ба ҳалокат расидааст.

Дар ҳамин ҳол, ба иттилои Радиои Озодӣ, дастгиршуда Парвиз Одинаев ва писараш Хисрав Одинаев ном дорад.

Тағоймурод Нурматов, раиси ҷамоати 10-солагии Истиқлолият 29-уми июл ба Радиои Озодӣ гуфтааст, ба маълумоти ӯ, писари ин мард баъди чанд маротиба танбеҳи падар ба хонаи як хешовандашон мегурезад.

“Баъдан мард фарзандашро гирифта ба як саҳро мебарад ва ба пушти мошин баста, ӯро кашола мекунад. Аз фаъолони деҳа ҳаминро фаҳмидем, ки гӯё ин мард пештар низ писарашро барои гапногирӣ зада бошад”, – афзудааст раиси ҷамоат.

Навори шиканҷаи ин наврас, ки зоҳиран худи падар сабт кардааст, ба шабакаҳои иҷтимоӣ роҳ ёфт ва хашми корбаронро барангехт.

Дар навор дида мешавад, ки наврас хуншор ва дар хоку хун олуда аст ва шахси сабткунанда аз ӯ мепурсад: “600 сомониро ту аз хона гирифтӣ?”.

Ба иттилои ВКД нисбати дастгиршуда бо қисми 3 моддаи 110 Кодекси ҷиноятӣ парвандаи ҷиноятӣ оғоз карда шуда, тафтишот идома дорад.

Тибқи ин банди қонун бо маҳрум сохтан аз озодӣ ба муҳлати аз дувоздаҳ то понздаҳ сол ҷазо дода мешавад