Соли равон дар Тоҷикистон нархи мева боло рафт ва сокинон аз он шикоят мекунанд, ки бо маоши кам имконияти хариди маҳсулоти қимматро надоранд.
Тибқи иттилои Вазорати кишоварзии Тоҷикистон мева нисбат ба соли гузашта бештар истеҳсол шудааст.
Дар ин миён танҳо ангур назар ба соли гузашта кам ҷамъоварӣ шудааст, чун сармои моҳи январӣ боиси талаф ёфтани ин намуди мева гардид.
Вале дар ин баробар содироти мева аз Тоҷикистон ба хориҷи кишвар ба маротиб афзудааст.
Масалан, то моҳи октябри соли равон 358,5 ҳазор тоннаро ташкил медиҳад. Аз он ангур 74,6 ҳазор тонна мебошад.
Соли гузашта то ин давра – моҳи октябр 215 ҳазору 861 тонна мева ҷамъоварӣ шуда буд. Аз ҷумла, дар ҷумҳурӣ ба миқдори 128,5 ҳазору тонна ангур ҷамъоварӣ гардида буд.
Давоми шаш моҳи аввали соли 2023 Тоҷикистон ба маблағи 24,1 миллион сомонӣ 103 навъи маҳсулоти кишоварзӣ содирот карда буд. Содироти мева 51,2 % зиёд шудааст.
Нархи як киллограмм ангур аз 15-20 сомонӣ оғоз шуда, то ба 50-60 сомонӣ мерасад. Ҳол он ки соли гузашта нархи ин навъи маҳсулот ба маротиб арзон буд.
Ҳоло дар бозорҳои Душанбе як килограмм себ аз 10 то 30-35- сомонӣ арзиш дорад.
Нархи хурмо, ки назар ба дигар мева кам харидор аст, гаронтар шудааст. Ҳоло як килограмм хурморо бо арзиши 20 сомонӣ мефурӯшанд, вале соли гузашта нархи миёнааш 5-7 сомонӣ буд.
Нархи дигар навъи меваҳоро дар навори Your.tj бубинед.
Дар аввали соли соли ҷорӣ музди миёнаи меҳнат дар Тоҷикистон ба 1878 сомонӣ баробар буд.
Дар Тоҷикистон, ки маоши ҳадди ақал 600 сомонӣ аст, на ҳама имконияти хариди маҳсулоти қиматро доранд. Тибқи оморҳои расмӣ 22,5 фоизи аҳолии Тоҷикистон дар ҳолати фақр зиндагонӣ мекунанд.
Идибеки Саид
