Оғози муҳокимаи гумонбарони ҳамла ба “Крокус” дар Москва

Имрӯз, 21 июл, додгоҳи низомие дар ғарби вилояти Москва муҳокимаи ибтидоии 19 нафарро, ки ба тарҳрезӣ ва анҷоми ҳамлаи террористӣ ба толори консертии “Крокус Сити Холл” муттаҳаманд, оғоз кард.

Ба навиштаи хабаргузории давлатии ТАСС, мурофиа пушти дарҳои баста мегузарад ва дар атрофи додгоҳ тадбирҳои бесобиқаи амниятӣ роҳандозӣ шудаанд.

Ҳамла дар канори Москва 22 марти соли 2024 рух дод. Дар натиҷа 149 нафар кушта ва 609 тани дигар маҷруҳ шуданд. Гурӯҳи тундрави “Давлати исломӣ” масъулияти ин ҳамларо бар уҳда гирифт, аммо мақомоти Русия иддао доранд, ки он бо амри хадамоти махсуси Украина анҷом шудааст.

Аз 19 нафар муттаҳам, аксар шаҳрвандони Тоҷикистонанд. Боздошти онҳо бо шеваи хушунатомез сурат гирифтааст, ки вокуниши густарда ва интиқоди тунди ҷомеаро ба бор овард.

Шиканҷа ва зӯроварии зидди инсонӣ, аз ҷумла буридани гӯши яке аз боздоштшудагон ва расонидани ҷароҳатҳои вазнин ба дигараш, сабаби ба вуҷуд омадани шубҳаҳо дар мавриди дурустии айбдоркуниҳо шудааст.

Мақомоти расмии Тоҷикистон то ҳол ба таври расмӣ ба ин қазия вокуниш накардаанд. Ҳуқуқшиносон ва созмонҳои ҳомии ҳуқуқ талаб доранд, ки ҷараёни мурофиа бо риояи меъёрҳои байналмилалӣ ва бе шиканҷа анҷом дода шавад.