Шумораи қурбониёни заминларза аз 21 ҳазор нафар гузашт

Шумораи ҳалокшудагони заминларзаҳои Туркияву Сурия ба 21 051 нафар расид, хабар медиҳад CNN бо такя ба мақомоти ду кишвар.

Ба гуфтаи муовини президенти Туркия, Фуат Октай дар ин кишвар теъдоди қурбониён ба 17 674 нафар расида, беш аз 72 879 нафар маҷрӯҳ шудаанд.

Бинобар гузориши расонаҳои давлатии Сурия дар ин кишвар дасти кам 3377 нафар, аз ҷумла 2030 нафар дар манотиқи таҳти назорати шӯришгарон дар шимолу ғарб ва 1347 нафар дар манотиқи таҳти назорати ҳукумати Сурия ба ҳалокат расидаанд.

Теъдоди захмиён дар Сурия дар тамоми манотиқи осебдида ба 5245 нафар расидааст: 2295 нафар дар манотиқи таҳти назорати ҳукумат ва 2950 нафар дар манотиқи таҳти назорати шӯришгарон.

Бар асоси гузориши ҳукумати Туркия ва расонаҳои давлатии Сурия, дар умум 78 124 нафар дар Сурия ва Туркия бар асари заминларзаи шадид ҷароҳат бардоштаанд.

Бояд гуфт, ки дар Туркия ва Сурия ҳудуди 80 ҳазор наҷотдиҳанда аз 19 кишвар кор мекунанд.

Аз ҷумла, 9-уми феврал 50 наҷотдиҳанда аз Тоҷикистон вориди Туркия шуданд.