Навори оташ гирифтани хонандаи мактаб таҳқиқ мешавад

Дар робита ба наворе, ки дар он саҳнаи оташ гирифтани як хонандаи мактаб дида мешавад, мақомоти милитсияи пойтахт вокуниш карданд. Навори мазкур чанд рӯз пеш дар шабакаҳои иҷтимоӣ нашр шуда буд. Ҳолати мазкурро Раёсати ВКД дар шаҳри Душанбе таҳқиқ мекунад.

Ба иттилои Раёсат, ҳодиса мазкур рӯзи 6-уми май дар Муассисаи таҳсилоти миёнаи умумии рақами 67 ноҳияи Сино ҳангоми машқҳо рух додааст.

 

Посмотреть эту публикацию в Instagram

 

Публикация от YOUR TJ (@your_tj)

Гуфта мешавад, дар мактаби зикршуда дар ин рӯз дар асоси нақша машқҳои мудофиаи гражданӣ ва омодагӣ ба ҳолатҳои фавқулодда гузаронида шудааст.

Дар навори видео дида мешавад, ки пушти куртаи хонанда оташ гирифта, ӯ дар ҳавлии мактаб медавад. Ду нафар бо либоси ҳарбӣ талош доранд, ки ӯро ба кӯрпа (плед) пӯшонанд, то ки оташро хомӯш кунанд. Лекин ба онҳо муяссар намешавад.

Наврас худро аз дасти “имдодгаронон” халос карда, либоси оташгирифтаашро аз тан бадар мекунад. Дар кадрҳо дида мешавад, ки даст ва тахтапушди наврас аз сӯхтор захм гирифтааст.

“Дар натиҷаи аз ҷониби масъулин риоя нашудани қоидаҳои бехатарӣ, зимни оташсузӣ пушти бадани хонандаи синфи 10-уми муассисаи мазкур оташ гирифта, ҷароҳати ҷисмонӣ бардоштааст”,- омадааст дар хабари Раёсат.

Зикр мегардад, ки вобаста ба ҳолати мазкур, айни замон аз ҷониби кормандони милитсия маводҳои зарурӣ тартиб дода шуда, бо мақсади андешидани чораҳои дахлдори қонунӣ мавриди тафтишоти пешакӣ қарор дорад.

Раёсат дар бораи ҷузъиёти дигари ҳодиса, аз ҷумла чӣ гуна ба либоси мактабхон гузаштани оташ хабар намедиҳад.