Милитсия: дар рӯзи ид кӯдаконро беназорат нагузоред

Раёсати ВКД дар шаҳри Душанбе аз волидайн ва шахсони онҳоро ивазкунанда даъват кард, ки дар рӯзи Иди Рамазон кӯдаконро беназорат нагузоранд.

Ба иттилои милитсия, ҳар сол дар рӯзҳои ид, "бахусус Иди Рамазон ва Иди Қурбон", бинобар беназоратии кӯдакон садамаҳои нақлиётӣ, бедаракшавии ноболиғон ва дигар қонуншиканиҳо бо иштироки наврасон ба қайд гирифта мешаванд.

Барои пешгирии ҳодисаҳои нохуш, милитсия аз волидайн хоҳиш намудааст, ки кӯдаконро дуру дароз беназорат нагузоранд ва шабгардию оворагардии онҳоро пешгирӣ намоянд.

Ҳамзамон, таъкид шудааст, ки дар ҳолати вайрон кардани қонун аз ҷониби кӯдакон, нисбат ба волидайн чораҳои дахлдори ҳуқуқӣ андешида хоҳад шуд.

Ёдовар мешавем, ки соли гузашта тибқи тағйиру иловаҳои нав ба Қонун “Дар бораи танзими ҷашну маросим дар Ҷумҳурии Тоҷикистон”, ки дар як ҷаласаи парлумони кишвар қабул гардид, “идгардак” барои кӯдакон манъ карда шуд.