Пагоҳ, 13-уми марти соли 2025, интизор меравад, марзи Тоҷикистону Қирғизистон тақрибан пас аз чор соли басташавӣ, дубора боз гардад.
Дар ин бора як манбаъ аз ҳукумати вилояти Суғд ба “Азия-Плюс” хабар додааст.
Ба гуфтаи манбаъ, кушодашавии расмии гузаргоҳҳои марзӣ бо ҳузури мақомоти баландпоя ва марзбонон аз ҳарду ҷониб сурат мегирад. Ҳанӯз маълум нест, ки роҳбарони ду кишвар дар маросим ба таври маҷозӣ иштирок мекунанд ё ҳузурӣ.
Қаблан, манбаи дигар аз ҳукумати Исфара хабар дода буд, ки президентҳои Тоҷикистон ва Қирғизистон ба таври маҷозӣ дар маросими кушодашавии ду гузаргоҳи марзӣ ширкат хоҳанд кард.
Имрӯз, 12-уми март, Эмомалӣ Раҳмон, президенти Тоҷикистон, бо як сафари давлатӣ ба Қирғизистон рафт. Ин сафар ду рӯз идома меёбад.
Ҳамчунин, барои инъикоси ин рӯйдоди таърихӣ гурӯҳи рӯзноманигорон ба минтақаҳои марзӣ даъват шудаанд. Яке аз хабарнигорони даъватшуда тасдиқ кардааст, ки пагоҳ ба сарҳади Тоҷикистону Қирғизистон меравад ва дар маросими бозшавии расмии марз ширкат хоҳад кард.
Марзи Тоҷикистону Қирғизистон пас аз даргириҳои марзии апрел-майи соли 2021 баста шуда буд.