Дар кони “Ангишти Шӯроб” – и шаҳраки Шӯроби шаҳри Исфара бар асари ихроҷи гази карбон 2 кӯҳкан фавтидаанд. Сабабҳои ҳодисаи мазкурро Комиссияи Хадамоти назорати бехатарӣ дар саноат таҳқиқ мекунад.
Ба иттилои маркази матбуоти КҲФ Тоҷикистон, ин ҳодисаи фоҷеабор соати 18:20 дақиқаи рӯзи 27 март рух додааст. Дар натиҷаи ихроҷи гази карбон 2 нафар кӯҳкани 45 ва 57 – солаи сокинони шаҳри Исфара ҳалок шудаанд.
“Як взводи Хадамоти ҷумҳуриявии ҳарбикунонидашудаи наҷотдиҳӣ – кӯҳии КҲФ дар шаҳри Хуҷанд фавран ба ҷойи ҳодиса сафарбар шуд”,- зикр мешавад дар хабари Кумитаи ҳолатҳои фавқулода.
Гуфта мешавад, наҷотдиҳандагон ҷасади ҳалокшудагонро аз кон берун оварда, ба мақомоти дахлдор супурданд.
