Номи 6 нафар қурбониёни садамаи маргбор бо иштироки автомобили мусофиркаши Ford Transit ва мошини боркаши DAF дар вилояти Костанайи Қазоқистон расонаӣ шуд. Ҳамаи онҳо шаҳрвандони Тоҷикистон будаанд.
Ин маълумотро Сафорати Тоҷикистон дар Қазоқистон тасдиқ кардааст.
Аз онҳо Аҳтам Каримови 36-сола, Назрулло Боқиеви 24-сола, Бахтигул Боқиеваи 40-сола, Юсуф Солеҳови 67-сола, Фаёзиддин Солеҳзодаи 35-сола ва Маҳмадюнус Аминзодаи 33-сола ном мебаранд.
Гуфта мешавад, ҳамаи ҳалокшудагон сокинони ноҳияи Қубодиёни Тоҷикистон буда, бо мақсади кор ба Русия мерафтанд.
Ба иттилои манбаъ, дар дохили мусофиркаш ҳангоми садама 11 нафар қарор доштанд ва 5 нафари дигар бо ҷароҳатҳои гуногун ба беморхона интиқол ёфтанд.
Департаменти полиси вилояти Костанайи Қазоқистон хабар медиҳад, тибқи қисми 4 моддаи 345 Кодекси ҷиноятии Қазоқистон “Вайрон кардани қоидаҳои ҳаракати роҳ ё истифодаи воситаҳои нақлиёт, ки боиси марги ду ё зиёда нафар аз беэҳтиётӣ шудааст” тафтишоти пешакӣ оғоз гардидааст.
Ёдовар мешавем, ки субҳи 20 май, ду километр дуртар аз гузаргоҳи сарҳадии марзи Қазоқистон бо Русия, автомобили мусофиркаши Ford Transit бо мошини боркаши DAF бархӯрд.
