Марде дар ҳолати мастӣ занашро бо бел зада куштааст

Кормандони милитсия марди 58-солаи сокини шаҳри Истаравшан бо гумони куштори ҳамсари 52-солааш дастгир кардаанд. Дар ин бора ВКД хабар дод.

Гуфта мешавад, ҳодиса шоми 2-юми март, тахминан соати 18:20 дар манзили онҳо рух додааст.

Гумонбаршаванда дар ҳолати мастӣ бо ҳамсараш муноқиша намуда, бо бели хоҷагӣ ба узвҳои бадани ӯ якчанд маротиба зарба задааст.

Дар натиҷа, ҷабрдида ҷароҳатҳои вазнини ҷисмонӣ бардошта, дар ҷойи ҳодиса ба ҳалокат расидааст.

ВКД менависад, нисбати гумонбаршаванда бо қисми 2 моддаи 104 Кодекси ҷиноятӣ (Одамкушӣ) парвандаи ҷиноятӣ оғоз карда шуда, тафтишот идома дорад.

Ин аллакай хабари дуюми кушта шудани зан аз ҷониби шавҳар аст.

Ёдовар мешавем, ки Вазорати корҳои дохилӣ рӯзи 3 март аз дастгир шудани як сокини 41-солаи ноҳияи Рӯдакӣ бо гумони куштори ҳамсари собиқи 32-солааш хабар дода буд.

Гуфта мешавад, ӯ занро 3 феврал дар шаҳри Санкт-Петербурги Русия куштааст.