КҲФ дар Ҳисор ҷасади навраси 12-соларо пайдо кард

Наҷотдиҳандагони Кумитаи ҳолатҳои фавқулодаи Тоҷикистон дар Ҳисор ҷасади як наврасро аз об берун оварданд. Гуфта мешавад, як писарбачаи 12-сола ҳангоми оббозӣ дар Канали калони Ҳисор ғарқ шудааст.

Рӯзи 16-уми июл, пас аз кофтукоби бардавом кормандони КҲФ ҷасади писарбачаро пайдо карда, ба мақомоти ҳифзи ҳуқуқ супурданд.

КҲФ аз волидон хоҳиш мекунад, ки кӯдаконро беназорат нагузоранд. Ба онҳо дар бораи оқибатҳои риоя накардани қоидаҳои бехатарӣ дар об ва шиноварӣ дар ҷойҳои мамнӯъ фаҳмонанд.

Ба иттилои ин манбаъ, дар нимсолаи аввали соли ҷорӣ дар кишвар 47 нафар ғарқ шудаанд, ки 26 нафарашон кӯдакону наврасони то 16-сола мебошанд.

Сабаби аслии ин ҳодисаҳо риоя нашудани қоидаҳои бехатарӣ дар об ва беназоратии кӯдакон аз ҷониби калонсолон арзёбӣ мешавад.