КҲФ ҷасади духтари 17-солаи сокини Панҷекатро аз Кӯли Ҷавонони Душанбе пайдо кардааст

Дирӯз, 31-уми март наҷотдиҳандагони Кумитаи ҳолатҳои фавқулодда дар шаҳри Душанбе ҷасади як духтари 17-солаи сокини деҳаи Артучи шаҳри Панҷекатро аз Кӯли Ҷавонон берун овардаанд.

Имдодгарон ҷасадро аз об берун оварда, ба мақомоти ҳифзи ҳуқуқ супурдаанд.

КҲФ сабабу ҳолати ғарқшавии ӯро шарҳ надодааст.

Ин ниҳод инчунин аз резиши санг дар километри 25-уми роҳи мошингарди Левакант-Данғара хабар додааст, ки бар асари он ду мошини сабукрави тамғаҳои “Mercedes Benz” ва “Opel Zafira” зарар дидаанд.

Гуфта мешавад, яке аз мусофирони ин мошинҳо бо ҷароҳати вазнин дар бемористони шаҳри Леваканд бистарӣ шудааст.

Ҳодиса 31-уми март, тахминан соати 14:35 ба қайд гирифта шудааст.

КҲФ менависад, барои тоза кардани роҳ аз сангрезаҳо техника ҷудо гардида, ҳаракати мошинҳо ба ду самт таъмин шудааст.