Эмомалӣ Раҳмон судяҳои чанд шаҳру ноҳия ва ҳайати роҳбарикунандаи вазорату мақомотҳоро иваз кард

Имрӯз, 18-уми июл судяҳои чанде аз шаҳру ноҳияҳо аз вазифа озод ва ба вазифаҳои дигар таъйин гардиданд. Дар ин бора президенти Тоҷикистон Эмомалӣ Раҳмон мутобиқи моддаи 69 Конститутсия фармон содир кард.

• Ҳамин тариқ, мутобиқи ин фармон Раҳмонзода Шариф Файз аз вазифаи раиси суди шаҳри Кӯлоби вилояти Хатлон озод гардида, судяи суди Вилояти Мухтори Кӯҳистони Бадахшон таъин карда шуд.
• Маҳмудзода Азаматшо Сафар аз вазифаи судяи суди ноҳияи Ванҷи Вилояти Мухтори Кӯҳистони Бадахшон озод гардида, судяи суди ноҳияи Рӯдакӣ таъин карда шуд.
• Зикирзода Лоиқ Хурсандқул аз вазифаи раиси суди ноҳияи Бобоҷон Ғафурови вилояти Суғд озод гардида, раиси суди шаҳри Душанбе таъин карда шуд.
• Аҳмадзода Ҷамшед Анвархон раиси суди ноҳияи Фирдавсии шаҳри Душанбе таъин карда шуд.
• Шоҳиён Муҳаммадсаид Алимардон аз вазифаи муовини якуми раиси суди шаҳри Ҳисор озод гардида, судяи суди шаҳри Душанбе таъин карда шуд.
• Нурзода Сайвалӣ аз вазифаи судяи суди шаҳри Кӯлоби вилояти Хатлон озод гардида, судяи суди шаҳри Душанбе таъин карда шуд.
• Раҷабзода Ҳотам Назар аз вазифаи раиси суди ҳарбии гарнизони Душанбе озод гардида, раиси суди ноҳияи Рӯдакӣ таъин карда шуд.
• Ҳабибуллозода Хайрулло аз вазифаи муовини раиси суди шаҳри Ваҳдат озод гардида, муовини якуми раиси суди шаҳри Ваҳдат таъин карда шуд.
• Асрорӣ Ифтихор Қурбон аз вазифаи судяи суди ноҳияи Рӯдакӣ озод гардида, муовини раиси суди шаҳри Ваҳдат таъин карда шуд.
• Қурбониён Баҳриддин Самариддин аз вазифаи судяи суди иқтисодии вилояти Хатлон озод гардида, муовини раиси суди иқтисодии вилояти Хатлон таъин карда шуд.

Ҳамчунин, мувофиқи чанд қарори дигари Ҳукумати Ҷумҳурии Тоҷикистон дар мансабҳои роҳбарикунандаи Вазорати мудофиа, Кумитаи дин ва вазорати кишоварзӣ тағйироти кадрӣ ба амал омад.

• Ҳамин тариқ, Бобозода Хисрав Хоркаш бо сабаби ба кори дигар гузаштан аз вазифаи муовини Вазири мудофиа оид ба аслиҳа ва техникаи ҳарбӣ — Сардори раёсати аслиҳа ва техникаи ҳарбии Вазорати мудофиа озод карда шуд.
• Носирзода Ҷаббор аз вазифаи муовини вазири кишоварзӣ озод карда шуда, муовини якуми вазири кишоварзии таъйин гардид. Ба ҷойи ӯ Назарзода Машокир Фозил муовини вазири кишоварзӣ шуд.
• Ваҳобзода Абдураҳмон бо сабаби ба кори дигар гузаштан аз вазифаи муовини раиси Кумитаи дин озод карда шуд.

Мувофиқи чанд амри дигари президент дар ҳайати идоракунандаи “Маркази исломшиносӣ дар назди Президенти Ҷумҳурии Тоҷикистон” низ тағйирот ворид гардид.

Ҳамин тарик, Наҷотзода Мутеъулло Абдулқосим бо сабаби ба кори дигар гузаштан аз вазифаи муовини директори ин муассисаи давлатӣ  озод, Ваҳобзода Абдураҳмон ва Абдухалилзода Кароматулло Абдухалил муовинони директори “Маркази исломшиносӣ дар назди Президенти Ҷумҳурии Тоҷикистон” таъин карда шуданд.

Дар мувофиқа бо Президенти Тоҷикистон прокуророни ноҳияҳои Ишкошим ва Шуғнони ВМКБ, шаҳрҳои Хуҷанд, Бӯстон, ноҳияҳои Кӯҳистони Мастчоҳ, Деваштич ва Ашти вилояти Суғд, шаҳри Бохтар, ноҳияҳои Вахш, Темурмалик, Абдураҳмони Ҷомӣ, Шамсиддин Шоҳин, Восеъ ва Ёвони вилояти Хатлон ва ноҳияи Лахш иваз карда шуданд.

Ҳамчунин дар ҳайати фармондеҳии ҷузъу томҳои Вазорати мудофиа ва Агентии назорати маводи нашъаовари назди Президенти Тоҷикистон тағйироти кадрӣ ба амал дароварда шуд.

Гуфта мешавад, Эмомалӣ Раҳмон кадрҳои навтаъйинро дар мақомоти суд, Прокуратура, Вазорати мудофиа ва Агентии назорати маводи нашъаовар барои суҳбат ба ҳузур пазируфт.

Зимни суҳбат президент ба фаъолияти мақомоти судӣ таваҷҷуҳи хос зоҳир карда, барои таъмини адолати судӣ ва баррасии шаффофи парвандаҳои ҷиноятӣ дастурҳои мушаххас дод, омадааст дар хабар.

Сарвари давлат аз кадрҳои навтаъйин талаб кард, ки ба волоияти қонун, мубориза бар зидди амалҳои дорои хусусияти коррупсионӣ, шаффофият, баррасии одилона ва таъмини адолату ҳақиқат зимни баррасии парвандаҳо диққати махсус диҳанд.

“Нисбат ба муроҷиати шаҳрвандон масъулияти бештар зоҳир карда, зимни баррасии парвандаҳо ва арзу шикояти мардум бо масъулияти бештар ва аз рӯйи адолат амал намоед”,- таъкид дошт Эмомалӣ Раҳмон.

Гуфта мешавад, кадрҳои навтаъйин аз ҳисоби мутахассисони варзидаи соҳа, хатмкардагони ду ва ё зиёда донишкадаҳои олии ҳарбӣ интихоб гардидаанд.

“Зимни интихоб ба вазифаҳои роҳбарикунанда мо ба сатҳи баланди касбӣ, садоқату поквиҷдонӣ ва донишҳои замонавии кадрҳо таваҷҷуҳи махсус зоҳир менамоем ва ҳар яки Шумо зимни адои вазифа ва масъулияти бардӯшдошта бояд манфиатҳои давлату миллатро аз ҳама боло гузошта, дар хизмати мардум бошед”,- таъкид намуд Эмомалӣ Раҳмон дар охир.