Эмомалӣ Раҳмон мардуми Тоҷикистонро ба Иди Қурбон табрик гуфт

Президенти Тоҷикистон мардуми кишварро ба муносибати Иди Қурбон табрик гуфта, сулҳу оромӣ, бахту иқбол ва баракату фаровонӣ орзу намуд.

Сарвари давлат дар паёми худ таъкид кард, ки фарҳанг ва маънои аслии иди Қурбон таҷассумгари имон, ихлос, садоқат, эҳтироми калонсолон, муҳаббат ба наздикон ва шукронаи неъматҳои ҳаёт мебошад.

Ба гуфтаи ӯ, иди Қурбон замоне барои хурсанд кардани ятимону ниёзмандон, аёдати беморон ва дастгирии шахсони эҳтиёҷманд аст.

Роҳбари давлат зикр кард, ки қурбонӣ танҳо барои шахсоне воҷиб аст, ки имконияти молии кофӣ доранд. Ӯ афзуд, дар шариати ислом қарз гирифтан ба хотири қурбонӣ ва оростани дастархонҳои серхарҷ зарурате надорад, зеро ислом исрофкорӣ ва намоишкориро маҳкум мекунад.

“Қурбон тӯй нест ва барои таҷлили он дастурхони серхарҷ оростан умуман зарурат надорад. Иди Қурбон – гузоридани намози ид, табрики якдигар, зиёрати падару модарон ва калонсолону беморон, изҳори таъзия ба азодорон ва анҷом додани қурбонӣ танҳо барои шахсоне мебошад, ки имконияти мусоиди молӣ доранд”,- гуфта шуд дар паём.