Эмомалӣ Раҳмон бо даъвати Путин ба Русия сафар кард

Имрӯз, 8-уми май президенти Тоҷикистон Эмомалӣ Раҳмон ба шаҳри Москваи Русия парвоз кард. Дар як суҳбати телефонӣ рӯзи 5-уми май аз ҷониби ҳамтои русаш Владимир Путин барои ширкат дар чорабиниҳои бахшида ба таҷлили Рӯзи Ғалаба даъват шуда буд.

Ба иттилои Хадамоти матбуотии президенти Тоҷикистон ин сафари президент “боздиди корӣ” аст.

Дар назар аст, ки Эмомалӣ Раҳмон дар рафти ин сафар ҳамчунин дар чорабиниҳои тантанавӣ бахшида ба 78-умин солгарди Рӯзи Ғалаба иштирок кунад, гуфта мешавад дар хабар.

Ёдовар мешавем, ки қаблан президенти Қирғизистон Содир Жапаров ягона роҳбари кишвари хориҷие дониста мешуд, ки дар таҷлили Рӯзи Ғалаба дар Москва иштирок мекунад.

Вале, тавре расонаҳо хабар медиҳанд, Владимир Путин инчунин, сарвазири Арманистон Никол Пашинян, президенти Қазоқистон Қосимҷомарт Тоқаев ва президенти Туркманистон Сардор Бердимуҳаммадовро низ ба Москва даъват кардааст.