Ятимов ва Тошиев созишномаи ниҳоии марзи Тоҷикистону Қирғизистонро имзо карданд

Саймумин Ятимов ва Қамчибек Тошиев раисони кумитаҳои амнияти миллии Тоҷикистону Қирғизистон (КДАМ) рӯзи 21 феврал дар шаҳри Бишкек созишномаи ниҳоии сарҳади ду кишварро имзо карданд.

Дар ин бора АМИТ “Ховар” хабар дод.

Гуфта мешавад, ҳамраисони ҳайатҳои ҳукуматии Тоҷикистон ва Қирғизистон гузориши роҳбарони гурӯҳҳои кории топографӣ ва таъйину аломатгузории сарҳади давлатӣ дар умум се созишномаи вобаста ба марзи ду кишварро ба имзо расонидаанд:

• Созишнома байни Тоҷикистон ва Қирғизистон дар бораи сарҳади давлатии ду кишвар;
• Созишнома байни Тоҷикистон ва Қирғизистон дар бораи сохтмон ва истифодаи роҳҳои мошингард ва истифодабарии чорроҳҳаҳо;
• Созишномаи байни ҳукумати Тоҷикистон ва Девони вазирони Қирғизистон дар бораи таъмини дастрасии дуҷониба ба иншооти обӣ ва энергетикӣ.

Ҷузъиёти бештар дар бораи ин созишномаҳо ошкор нашудааст.

Ба навиштаи расонаҳои Қирғизистон, акнун ин санад бояд ба раҳбарони ду кишвар барои имзо пешниҳод гардад.

Саймумин Ятимов, раиси КДАМ-и Тоҷикистон баъди имзои созишнома дар суҳбат бо расонаҳо гуфтааст, ки “баъд аз корҳои тӯлонӣ, душвор, вале самаранок, созишномаҳо дар бахшҳои обу энергетика ва роҳсозӣ омода ва имзо шуданд”.

“Муҳимтарин санади таърихӣ, ки имрӯз ба имзо расид, Созишнома дар бораи таъину аломатгузории марзи Қирғизистону Тоҷикистон аст”, - изҳор доштааст Ятимов.

Ӯ таъкид кардааст, ки ниҳоят ин ҳуҷҷатҳо ба марҳилаи ниҳоии худ расиданд ва пас аз имзои роҳбарони давлатҳо, "ормонҳои таърихии мардумони моро инъикос карда, ба манфиатҳои сиёсӣ, иҷтимоӣ, фарҳангӣ, иқтисодӣ ва дигар бахшҳо хизмат мекунанд”.

Қамчибек Тошиев, раиси КДАМ-и Қирғизистон низ дар суҳбат бо хабарнигорон гуфтааст, “мо санади ниҳоии таъини сарҳади Қирғизистону Тоҷикистонро имзо кардем”.

“Мо ниҳоят мувофиқаи ниҳоии тамоми дарозии хатти сарҳадро анҷом додем", - иброз доштааст Тошиев.