Як зан дар Фархор худ ва чор кӯдакашро ба дарё андохтааст

Як зан дар деҳаи Қизилсуи ноҳияи Фархори Тоҷикистон рӯзи 30-уми июн худ ва чаҳор кӯдакашро ба дарёи Сурхоб андохтааст.

Наҷотдиҳандагон бо кӯмаки сокинони маҳаллӣ занро зинда ва ҷасади ду кӯдакашро аз об берун кардаанд, хабар медиҳад Радиои Озодӣ бо такя ба Кумитаи ҳолатҳои фавқулоддаи кишвар.

Рӯзи 1-уми июл ҷустуҷӯи ҷасадҳои ду кӯдаки дигар идома дорад.

Дар бораи ин зан ва кӯдаконаш ҳоло маълумот нест, ки чандсола буданд.

Ба иттилои Радиои Озодӣ, модари ин кӯдакон боздошт ва нисбаташ тибқи моддаи 104, қисми дуи Кодекси ҷиноятии Тоҷикистон, парванда боз шудааст.

Қаблан ҳолатҳои ба об андохтани худ ва фарзандон аз ҷониби занон расонаӣ шуда буд. Аз соли 2013 то 2020 ҳафт ҳолати худ ва кӯдаконро ба об андохтани занон сабт шудааст.

17 августи соли 2020 сокини ноҳияи Рашт худ ва се фарзандашро ба дарёи Сурхоб партофта буд ва ҳамаи онҳо ба ҳалокат расиданд.

4-уми июли соли 2015 зани 30-сола бо чор фарзандашро худро ба канали Ҳисор андохта буд. Занро зинда берун оварданд, баъдан ҷасади кӯдаконро пайдо карданд. Зан бо ҳукми суд 18 сол аз озодӣ маҳрум гашт.