Як рӯз ташхиси тиббии ройгон барои аҳолии Тоҷикистон

Ба муносибати Рӯзи ҷаҳонии тандурустӣ, ки ҳамасола 7-уми апрел таҷлил мешавад, сокинони Тоҷикистон рӯзи 5 апрел имкон доранд машварат ва муоинаҳои тиббии ройгон гиранд.

Дар ин бора Вазорати тандурустӣ ва ҳифзи иҷтимоии аҳолии Тоҷикистон хабар медиҳад.

Тибқи иттилои вазорат, рӯзи 5 апрел аз соати 08:00 то 12:00 дар тамоми муассисаҳои тиббии кишвар – аз ҷумла дар муассисаҳои ҷумҳуриявӣ, беморхонаҳои вилоятӣ, шаҳрӣ ва ноҳиявӣ, инчунин дар дармонгоҳҳо машварат ва ташхису муоинаҳои тиббӣ ройгон гузаронида мешаванд.

Гуфта мешавад, “ташхису табобатҳои гаронарзиш” истисно мебошанд, вале дақиқ карда нашудааст, ки онҳо кадомҳоянд.

Инчунин, дар ин рӯз “Пажӯҳишгоҳи гастроэнтерологияи Тоҷикистон” чорабинии расмии Вазорати тандурустӣ бахшида ба Рӯзи ҷаҳонии тандурустӣ баргузор мегардад. Дар он роҳбарияти вазорат, устодон ва мутахассисони варзида ширкат хоҳанд кард.

Вазорат шаҳрвандони кишварро ба иштирок дар ин чорабинӣ ва истифода аз “имконияту шароити муҳайё барои беҳтар намудани саломатии худ” даъват кардааст.