Як низомӣ дар Ашт барои қаллобӣ ҷазо гирифтааст

Дар ҷамоати Ориёни ноҳияи Ашти вилояти Суғд сардори мизи ҳарбиро барои гирифтани 15 ҳазор сомонӣ дар ивази таҳияи билет ва аз хидмат озод кардани як сокини ноҳия ҷазо додаанд.

Тавре Радиои Озодӣ менависад, ҳукми Суди ноҳияи Ашт рӯзи 9-уми феврали имсол содир шудааст, вале ному насаби низомиро ошкор накардаанд.

Гуфта мешавад, ҳодиса ҳангоми даъвати тирамоҳии ҷавонон ба артиш дар соли 2023 рӯй додааст. Сардори мизи ҳарбиро зиёда аз 62 ҳазор сомонӣ ҷарима баста, инчунин, як сол аз ҳаққи гирифтани мансаб дар бахши низомӣ маҳрум кардаанд.

Дар Тоҷикистон соле ду маротиба – баҳор ва тирамоҳ даъвати ҷавонони аз 18 то 27-сола ба артиш сурат мегирад. Дар ин давра бо шеваҳои гуногун ҷавононро маҷбуран ба хизмат ҷалб кардани мақомот расонаӣ мешавад, вале солҳои охир аз афзоиши сафи ихтиёриён мегӯянд.

Дар Тоҷикистон як сабаби асосии сарпечии ҷавонон аз дар бадрафторӣ дар сафи нерӯҳои мусаллаҳ медонанд, ки гоҳе бо маргу маъюб шудани онҳо меанҷомад.

Ёдовар мешавем, ки Эмомалӣ Раҳмон, президенти Тоҷикистон рӯзи 5-уми март фармони даъвати баҳориро имзо кард.

Мувофиқи он сарбозоне, ки муҳлати муқарраргардидаи хизмати ҳарбиро адо намудаанд ба эҳтиёт рухсат дода шуда, ҷавонмардони солҳои таваллуди 1997-2006 ба хизмати ҳарбӣ даъват карда мешаванд. Даъвати баҳорӣ аз 1-уми апрел оғоз шуда то охири моҳи май идома меёбад.